爆咗幾場後，第五場三班1000米直路賽，終於開番次大熱Win，主角由13屆本港冠軍騎師韋達策騎、隸屬大摩旗下的「駿皇綵」，今趟起步雖然唔係應聲彈出，沿途只係守住第二位，但末段一加速即從後殺上，以輕鬆姿態拋離馬群再下一城。此駒強勢保持香港出賽不敗，單Win及組合獨贏A1分別派25.5及15.5元。
大摩連同第三場以「喜蓮獎星」攻下女皇銀禧紀念盃，話咁快全日跑咗只係五場馬，佢已經憑一對連捷馬起孖兼捧盃，繼續在練馬師榜迫近領先的蔡約翰排行第二。
講番「駿皇綵」，這匹3歲澳洲自購馬上仗在港初跑，由韋達贏三班直路賽，距離亞軍馬「運來寶寶」一馬位，馬主譚少強日前設宴慰勞大摩馬房員工，當時韋達同大摩另一愛將祈普敦在晚宴上都抽中獎。呢次「駿皇綵」由配搭、騎師到班次一模一樣，但排1檔是直路賽最衰位，不過仍無驚無險地完成連捷，且以三個半馬位之多輕取第二名「萬事欣」，表現比上次更為突出，質素擺明超到暈。
第五場二至四名順序為「萬事欣」、「幸運飛駒」及「陽光大地」，四重彩派一萬七千幾。
另外，呢場14號馬「幸運興隆」獨贏閘前着綠燈有重注押下，惟入閘後卻鬧情緒，最終被拖離閘箱，並被着令退出比賽。結果孖寶投注了「幸運興隆」的注碼，依例轉投大熱門1號「駿皇綵」當中。