大家樂（341）舊年中請來男神黃子華拍廣告，不停loop住「快樂第一」，點知轉頭被員工踢爆旗下快餐店有地獄更表，員工由朝做到晚直踩16粒鐘，結果成件事變成關公災難。一年未夠，大家樂最近已經換咗廣告公司。
大家樂新近聘用廣告公司Leo Burnett Hong Kong，根據Leo Burnett網頁，公司嘅客戶包括P&G、可口可樂、麥當奴等，據行內人所講，呢間廣告公司收費屬於一線水平，簡言之即係唔平喇。睇嚟大家樂今次又係落重本想挽救形象。
舊年中大家樂重金請黃子華拍廣告，sell溫情同快樂，成件事其實冇問題，網民亦非針對廣告本身，而係不滿大家樂管理層不理員工死活。
大家樂請來新廣告公司幫公司做形象，聽講都係離不開講香港人與大家樂共同成長，但說到底，一間公司或一個產品要形象好，最緊重係本身質素高，只得包裝，冇用㗎喎。