傳奇練馬師告東尼雖然有葡萄牙血統，但就係土生土長嘅香港人，73－74年度首次以騎師身份出賽，直至96年從馬鞍上退下，六次獲得香港冠軍騎師殊榮。
告東尼退役後轉向練馬師之路出發，至今奪得兩次香港冠軍練馬師頭銜，多年來不乏支持者將名下愛駒交予告東尼訓練，包括香港一代短途馬王「精英大師」，人馬共締造17場連勝紀錄。告東尼上年再培養出準馬王「巴基之星」，至今出賽8場，成績3冠3亞。
作為本土練馬師代表人物，告東尼喺前年2月，以「萬事欣」取得第1000場香港練馬師生涯勝仗，成為香港三位千勝爺之一。今個月8日，更將勝場增加至1100場。如果連同騎師身份在港取得嘅946場頭馬，告東尼喺香港嘅勝場總數就超過2000場，相當犀利。
咁出色嘅表現，點可以唔表揚呢？馬會上年就新增咗個獎項，命名為「告東尼獎」，用以獎勵每年在該季內贏得最多頭馬嘅本地自由身騎師或本地見習騎師。