剛周三（22日）夜馬，「勁勇威龍」同「勇創潮流」同一時間過終點，兩駒影相影足4、5分鐘，按照經驗，呢類情況多數都會皆大歡喜，出現平頭。不過相片幾過幾輪放大後，最終分出勝負，雷神之「勁勇威龍」以一條毛之先險勝。
呢張相成為圈內人話題，話說當晚等候影相結果期間，有其他練馬師走來「八卦」，就係告東尼。告仔見到「勇創潮流」騎師蘇狄雄（Ben仔）等候結果時非常緊張，告仔就同Ben仔講，話感覺上「勇創潮流」坐和望贏，而前騎師、現任大摩副練王志偉啱啱經過，亦同Ben仔講聲Good luck，大家都係本地紅褲子出身，給予支持夠晒warm，可惜「勇創潮流」影輸僅敗，始終運氣係賽馬一部份。
「勁勇威龍」影贏，練馬師文家良當晚冇沾沾自喜，反而抹一額汗，並坦言目前僅僅取第九Win，仍要繼續追數多7場才達標。
今日（26日）沙田日賽文家良有匹實力馬，第八場三班1600米隻「紅麗舍」，上次服役初出140倍照贏，擺明有潛質。事實上，「紅麗舍」馬主李卓然隻團體馬「笑春風」在文家良旗下，初出入Q再出搞掂取勝，作風進取，因此「紅麗舍」隨時再下一城。