吳啟華話過細佢21年嘅離婚太太石洋子永遠都係屋企人，分手仲係好朋友。世事無絕對，愛情冇咗啫，友情其實都仲喺度，圈中亦有唔少例子。
謝賢 狄波拉
離婚後成為朋友，最經典都肯定係呢一對。四哥同拉姑除咗經常都約埋飲茶湊孫之外，分手後再各自搵到新戀情，四哥有位年輕49年嘅女友CoCo，拉姑就與搵到佢嘅鬍鬚Kong，令人羨慕嘅係，四哥同拉姑都好大方，經常兩pair人咁一齊現身出席活動。
麥當娜 辛潘
美國樂壇天后麥當娜（Madonna） 同辛潘（Sean Penn） 於1985年結婚，夫妻關係維持咗4年，分手後兩人藕斷絲連。前幾年娜姐世界巡唱，辛潘都有撐場，辛潘女兒Dylan Penn仲大爆老竇對娜姐依舊係咁欣賞。而喺上年慈善籌款晚宴，娜姐仲講笑話辛潘如果用15萬美元（約117萬港元）bid佢，就肯再次同佢結婚。
馬清偉 薛芷倫
薛芷倫02年與大生銀行家族成員馬清偉盛傳婚變，直至03年終於首次承認分居一段時間，薛芷倫當時話過：「我同馬生嘅關係永遠係一世嘅好朋友同知己。」
曾志偉 王美華
曾志偉三任太太當中，最為人熟知嘅就係「寶媽」王美華，不過佢曾經向傳媒呻，話志偉為朋友忽略家庭、「做曾志偉的女人好苦」，兩人最終離婚。直至今個月，曾志偉同寶媽喺台灣同場出現，喺台上有互動，更難得係兩人終於被影到同框。