黎明前晚於中環海濱活動空間舉行一場全港首次最大型戶外企位演唱會「Leon's Penguins in Live」，捧場的胡楓（修哥）企足全場、李彩華和男友何遠恒跳不停。
嘉賓鄭秀文（Sammi）晒腿唱《信者得愛》，收音咪疑故障而有時冇聲，跟黎明合唱《Prima-Donna》時耳機疑再失靈，有幾句歌詞跟不上音樂節奏。Sammi落台後，黎明抵死說：「真係驚喜，着短褲嚟。」之後他化身明蝠俠唱《我唔係死蠢》後說：「今次冇幸運大抽獎坐摩天輪，或者無特別禮物，你哋真係冇投訴？我真心多謝嚟自唔同地方支持我嘅朋友。」他還提醒歌迷查電郵，會有機會抽中外國歌手在同一場地舉行活動的門票。
讚氣氛好
Sammi其後趕往銅鑼灣出席電影《合約男女》突襲戲院見觀眾，大談擔任演唱會嘉賓的感受：「氣氛好好，個個配合快歌企喺度跳係好開心。」想在中環做戶外騷？她謂：「未有呢個諗法，紅館配套多，室外騷唔易做。」
另有購票欣賞演唱會的《蘋果》讀者報料指，C1區的門票位置大部份時間被約兩層樓高的嘉賓席阻擋視線。製作單位PLAYER ONE及A MUSIC發言人王凱文昨日回覆時先致歉，「嗰個位置入面係一個大型工作台，放咗好多大型機器。我哋絕對重視每位入場觀眾，否則唔會搭超長舞台。之後仲有兩場騷，會將C1區附近大帳篷拆走。」
採訪：王連連、張俊銘
攝影：陳俊強、仇志德