爾冬陞：業內大多數支持曾
「『八人小組』曾經向業內作出廣泛嘅諮詢，而我哋接觸到嘅人士，絕大部份都支持曾生（曾俊華），所以『八人小組』一致决定提名畀佢（爾冬陞在去年底的選委會選舉中，與部份電影界人士如施南生及張堅庭等合組8人名單，最終僅他取得一席，成15席中的異類）。」
詹劍崙：唔會諗政治前途
「有競爭係好事，而且佢（曾俊華）係民望最高嗰個，順理成章，業界有民調顯示曾俊華有六成支持，作為選委有責任反映業界民意……（會否擔心中央秋後算賬？）梗係唔諗得咁多，但感覺上係寂寞啲囉，（提名有否掙扎？）都有啲㗎，但唔會諗自己嘅政治前途先……真係唔想見到香港咁壁壘分明，相信香港真正講道理嘅人好多，唔好成日分顏色、黃色。」
何栢良：認同要休養生息
「認同曾俊華嘅休養生息理念，過去數年香港社會太多撕裂及對立，需要時間復元，（曾俊華）於社會及醫學界嘅建制及非建制陣營均獲廣泛接受，係眾望所歸……政改及23條立法係好複雜嘅議題，涉及北京的因素，認為推行政改及23條，個人（能力）重要過幾時做同點樣做；根據曾俊華喺政府嘅表現，顯示佢有誠信及有辦事能力，但現階段未決定投票意向。」
徐聯安：夠專業具親和力
「我自己做嘅業界民調，有六成人支持曾俊華參選，我係業界選出嚟，梗係業界意見行先……曾俊華對金融政策有認識，行事方式亦有專業水平，親和力亦相對高。（有指曾俊華Hea住做？）如果Hea住做都做到九年嘅財政司司長，咁都幾叻……我冇遇政治壓力，投票時都係支持曾俊華，我哋做金融界，牙齒當金使，一就一、二就二㗎喇。」
何栢霆：投邊個唔使批准
「相信曾俊華能令香港社會平和啲，加上政綱總算幾啱聽，故提名佢入閘；反而業界問題方面，𠵱家好多問題都解決唔到，曾俊華能落實到政綱固然係好事，做唔到都冇辦法……（政界一片中央挺林鄭月娥風聲流傳，會否擔心挺曾俊華換來清算？）怕咩呀？我行使公民權都驚呀？我投邊個係個人意願，唔使邊個批准我喎！」
