新一季日職聯賽喺上周六開鑼。上季浦和紅鑽將幾乎食到口嘅總冠軍嘔番出嚟，季前日超盃被鹿島鹿角完場前入波絕殺；到上周六聯賽打頭陣作客橫濱水手，點知又係臨尾香，完場前連失兩球輸2:3。紅鑽出師不利，問句為何受傷的總是我？
紅鑽喺上季日聯總決賽，踢到次回合仲係大好形勢，點知喺主場俾鹿角連入兩球，最終輸作客入球冇咗個總冠軍。今季季前日超盃又對鹿角，辛辛苦苦收復落後兩球失地，扳平2:2之後點知喺83分鐘失波，輸2:3飲恨又冇多個冠軍。紅鑽喺上周二亞冠盃分組賽發威，作客西悉尼流浪者大勝4:0而回，氣勢如虹迎接新一季日聯首戰，點知都係出事。
水手錄日聯400W
紅鑽作客橫濱水手一仗，喺開賽13分鐘先失守，到下半場形勢逆轉，今季季前由新潟天鵝加盟紅鑽嘅巴西前鋒拿費爾達施華，繼亞冠盃賽事之後再次建功，仲要喺63同65分鐘閃電連入兩球，反超前至2:1。戰況到完場前再大變，水手喺86分鐘由葡萄牙前鋒曉高韋拉建功扳平，到補時兩分鐘，主隊中場前田直輝再入一粒，助主隊反勝3:2，亦係水手歷來第400場日聯勝仗。
紅鑽入球功臣拿費爾達施華賽後話：「兩隊喺今場波都有唔少入球機會，雖然紅鑽喺今場波整體表現唔錯，但我對最後一分都拎唔到就覺得好失望。要忘記唔開心嘅事情，最好方法就係發生一件開心嘅事，下場波我哋會轉戰亞冠盃，主場迎戰FC首爾，會全力爭取贏波。」
轉倉老將表現一般
紅鑽繼續黑，衞冕嘅鹿島鹿角都一樣係喺新一季日聯出閘脫腳，仲要喺主場輸波。鹿角首戰喺主場迎戰FC東京，整體表現相當一般，全場只係得六次攻門，威脅有限。踢到82分鐘，鹿角守將三竿雄斗擺烏龍，令FC東京以1:0爆冷贏波而回。
上屆神射手大久保嘉人今季由川崎前鋒轉投FC東京，喺呢場波正選上陣踢足全場，但表現唔算突出。另一位「轉倉」日聯名將、中場老將中村俊輔，由橫濱水手過檔去磐田山葉，但一樣係踢足90分鐘，但作客大阪櫻花0:0和局收場。