未滑過雪，都可以去參加世錦賽？喺芬蘭拉迪舉行緊嘅FIS世界滑雪錦標賽日前上演男子組10公里越野滑雪資格賽，有位名為阿祖安蘇蘭奴（Adrian Solano）嘅委內瑞拉選手一出發就跌跌撞撞，全程幾乎冇衝刺成份，甚至連行走都成問題，最終未能完成賽事，好彩佢之後再度挑戰1.6公里資格賽，終於以13分49秒33完成，就算喺156位出發選手中包尾，比首名時間足足慢超過10分半鐘，兼被傳媒恥笑為「歷來最差選手」，一樣咁開心！
不過，原來呢次只係蘇蘭奴首次係真雪上比賽！據報佢喺炎熱嘅委內瑞拉一直只係透過裝上滑輪嘅滑雪板做模擬練習，就算賽前想過境法國去瑞典實地訓練，但因法國當局唔信佢係滑雪選手，以為佢只係尋求庇護或非法打工而驅逐出境，引發一場小小外交風波；另外，亦有網民指佢擁有軍方背景先獲准參賽。無論如何，蘇蘭奴總算以自身努力衝過終點，更揚言未來以參加冬季奧運為目標：「我達成咗一個夢想，呢件事令我每日想嘗試更多可能。」