李斯特城上周四炒領隊雲尼亞里，英國傳媒陸續爆料，包括李城班主維猜，早喺對西維爾嘅歐聯16強比賽前，已經決定炒人，即係話就算李城贏波，小雲都要走人，而且小雲仲喺西維爾準備返英國時，喺機場酒店接到被炒消息。
班主買定酒炒小雲
雖然李城英超席位危危乎，不過就無損維猜掃貨心情，周四維猜就去倫敦一間著名紅酒店狂掃總值50萬鎊（約480萬港元）嘅靚靚紅酒，維猜仲同撞到嘅韋斯咸副主席白拉迪爆將會炒小雲，比起官方公佈早一個鐘㖭。
不過65歲嘅雲尼亞里上周五發表離隊宣言，都好大方祝福球會同兩位助教，亦話喺李城有美好時光，而且返屋企途中，就遇上一位師奶球迷，帶住兩位小朋友送上慰問卡，小雲都好好人同佢哋合照。小雲被炒主因，英國傳媒就話係隊中骨幹集體反佢所造成，不過暫代領隊莎士比亞已經否認其事，而門將卡斯柏舒米高亦公開感謝小雲。而李城接任領隊人選方面，意大利籍教頭文仙尼已公開拒絕喎。