建制派食住幾萬差人集會撐七警，又再提出立辱警法，民主黨立法會議員林卓廷以辱警界線模糊反對，點知周融嘅HKG報當執到寶，喺facebook發文「侮辱有幾難界定？話林卓廷係『犬』又算唔算侮辱？」
不過阿廷就唔同佢癲，唔直接反駁佢，改用故事答佢。阿廷喺facebook引用一個蘇東坡同佢朋友佛印和尚故事。
話說蘇問佛印點睇佢，佛印答佢「佛也」，喺呢個時候蘇東坡懶醒咁話，睇到佛印個樣好似狗屎。
蘇東坡以為自己口舌贏咗佛印，點知返屋企同個妹講，蘇小妹就話阿哥你輸咗喇，因為佛印心中有佛，所以睇人似佛，哥哥你話睇人似狗屎，咁你心中有乜就可想而知！
阿廷講呢個故仔，就係想同HKG報講，HKG報話佢係「犬」，其實邊個先係狗？怕且唔使畫公仔畫出腸！