「志雲大師」陳志雲雖然最近為自己2009年收受利益案嘅官司上訴到終審法院忙到一頭煙，不過佢都好識得忙裏偷閒，噚日去咗一睹抽象派大師畢加索嘅真迹。入到場志雲大師當堂都變咗小粉絲，好認真咁睇每一幅畫，連館長解說都唔放過，非常踴躍發問。
畢加索瞳孔現積琪蓮
唔知志雲大師望咗咁耐，最鍾意邊幅呢？佢就話都係《穿着印刷裙子的積琪蓮肖像》最有feel，畫中人對眼好似識講嘢咁！積琪蓮即係畢加索最後情人兼第二任老婆，今次展覽時代廣場籌備咗2年，先邀請到西班牙巴塞隆拿畢加索美術館借出13幅同積琪蓮有關嘅作品嚟香港展出。
八方冇乜藝術慧根，淨係留意到門口有幅巨相近距離影大師對眼，原來張相係積琪蓮操刀，仔細望吓畢卡索右眼瞳孔，可以見到積琪蓮身影；同一時間以大師愛妻命名嘅《積琪蓮》油畫就掛正幅相對面，呈現兩夫婦親密關係。
畢加索美術館館長LLUIS BAGUNYÀ話，呢批真迹唔會隨便展出，每年展期最多得4個月，其他時間就要收番入美術館嘅保護室，而今次展出花咗好多心機控制室溫維持約20℃、濕度介乎15%至59%、調校光線等，以免損壞真迹。展覽由2月26日至3月21日期間喺銅鑼灣時代廣場地下Living Room Museum舉行，每次只准15人限時10分鐘參觀，免費入場。
李八方
