薯片叔叔曾俊華參選特首後人氣爆錶，除咗早前現身渣馬，吸引大批跑手爭相索取合照後，噚日喺競選辦樓下食晏時間會見傳媒時，一出𨋢即惹來陣陣尖叫聲，原來有大班咁啱喺灣仔合和中心經過嘅家長同細路仔，一見到薯片叔叔即異常興奮，即時捉住佢影相，令原本12點正開始嘅記者會，都因此遲咗少少先開始。
食晏預留15分鐘影相
八方聽聞，競選辦喺合和中心的薯片叔叔，選舉期間出去食晏都唔容易，皆因佢每次外出，都吸引大批市民合照，每次進入同離開餐廳途中，都要預至少10至15分鐘，畀捉住佢嘅市民影相至可以離開現場。
過去推動政改時，面對示威者時曾經講過「多謝你咁大聲」成名嘅薯片叔叔，噚日就獲競選辦為佢特別預備咗個無聲咪加個大喇叭，確保傳媒聽得清楚薯片叔一字一句，真係名副其實要講句「多謝你咁大聲」。