慎防手機 - 左丁山

慎防手機 - 左丁山

二月十四日華爾街日報報導,美國交通意外事件之撞車次數,近年有增無減,一間大型保險公司做咗一輪研究之後,認為撞車與司機擁有手機有關,智能電話數量之增加與交通意外之攀升,有統計相關(correlation),簡單啲講,就係手機之增長率與意外之增長率成正比,推論手機係交通意外之元凶。
點解咁講?因為呢間保險公司同時做一個「司機使用手機行為調查」,發現超過三成美國人一邊揸車一邊讀寫短訊,甚或上網,容易製造路上意外。
司機點可以揸車時搞WhatsApp之類?左丁山要兩隻手先至可以在手機寫字或打字,揸車時無可能兩者兼顧,但又真係見過不少搵食的士在軚盤上及左右兩旁,裝咗五六部手機,同時兼顧,佢地手指、耳朵之靈活,近似神乎其技。左丁山揸車時亦不用免提裝置及藍牙,手機聲響,例牌唔聽電話,識得嘅老友唔好鬧左丁山大牌呀,只係揸車時安全第一啫。
揸車唔睇手機,行路時唔睇得唔得?網上傳來傳去之台灣富商辜成允飲酒後上電梯踏空,之後連環碰撞卒至斃命事件之短片,真係觸目驚心,左丁山試過在置地廣場歷山大廈交界落樓梯(好彩只有四五級)睇手機,搞到PK之後,現在一見到樓梯,例必將手機放入褲袋或衣袋,年紀大了,跌親可能會係大件事,呢日新亞大師兄在歷山大廈北京樓請食飯,見佢行路不甚自然,問一問:原來係年前在珠海一間酒樓跣低,竟傷了筋骨入院留醫兼休養一段時間,人老了,就不能百分百完全康復無事。長者在七十歲左右或以上,最常見嘅意外就係無端端跌親,後果可大可小。一位老友前輩告誡左丁山:「你要凡事慢三拍先至啱,唔聽電話,唔睇短訊,唔死得人,最好係得閒先至覆,唔好俾電話牽住鼻子走。掛住講電話與覆短訊而仆親,反而會死得人㗎!」又係嘅,我地普通平民,雖則關心本港與世界大事,但大事唔輪到我地理,你估係特朗普與安倍晉三,一邊食餐一邊要聽住北韓發射飛彈嘅突發事件乎。前輩老友話美國有了一個特朗普總統,搞到連平靜小國瑞典都騷擾埋,如果日日跟隨(follow)特朗普嘅Twitter,血壓都會上升。左丁山對前輩講:「我地逢跑馬就躲在馬場一角,不求聞達於諸侯,係幾十年來最好嘅對策,學典型香港仔曾蔭權咁叻努力爬上去,結果又如何呢!」