喺北京舉行嘅人大政協兩會仲有唔夠一個星期就開始，作香港建制龍頭大黨嘅民建聯當然有人出席，佢哋噚日就以「六張好牌」做賣點，講述佢哋喺兩會嘅建議同提案，譬如爭取港人喺內地定居享有內地人嘅待遇、同埋爭取快啲搞掂高鐵一地兩檢等，大家又覺得係唔係「好牌」呢？
全國政協委員彭長緯話，回歸都廿年，但係港人嘅國民身份唔見得增加，反而發生佔中、旺角暴亂，所以應該開放畀香港人返內地做公務員、陪審員同埋參軍，認識多啲祖國。港區人大代表葉國謙仲話，內地應該快啲推出港人返內地定居，可以享有內地醫療、子女入學等福利嘅法例，事關台灣已經有相似嘅安排。八方心諗，香港人返內地做公務員做咩好呢？做公安定城管？定係入港澳辦、中聯辦幫手落實港人治港？你估中央會放心咩？