有白鴿黨大長今之稱嘅靚女區議員曾素麗（Yen），前日就出單張，將會喺四月搞佢做區議員後第一次旅行團。
旅行團目的地係韓國，諗住同街坊去韓國釜山五日賞櫻，仲可以嘆埋補身人參雞湯、韓式傳式燒肉等，成人同小童分別只需$4,980同$3,980，難怪阿Yen都話抵去，仲話去韓國梗係跟「大長今」啦！
阿Yen透露，之前諗過搞去日本的賞櫻團，但成團要每人近萬元，實在太貴，所以改變諗法返大長今「鄉下」。
阿Yen話，中學同大學時去過韓國首爾，但釜山就係第一次去，笑言若然今次成功集合到廿多人成團，會考慮吓去到韓國時，租套韓服着畀大家睇睇，咁大家到時咪可以見到「大長今」真身？