方力申舊年同拍拖10年嘅Setphy分手後，雖然間中有零星緋聞，不過仲有幾日就37歲生日嘅佢，至今仍未承認再有新戀情。今次被爆佢同強國女fans撻着，仲煙韌到繑晒手食晚餐，又真係會令人閃過一絲懷疑。
好多人話國產女主動又懂哄人，近年圈中都有唔少男星，宣佈投入國產女懷抱。當中有唔少仲要係「父女戀」。
魏駿傑(49歲)、張利華(29歲)
近年主力返內地發展嘅魏駿傑，2008年同國產女張利華閃婚，二人育有6歲大囡囡Jessica。不過老婆早年俾人影到同前港隊單車手鄧宏業過從甚密，兩公婆婚姻亮紅燈，最終魏駿傑選擇挽救婚姻，但二人近日又傳出婚變消息。
郭富城(51歲)、Moka方媛(29歲)
同熊黛林分手後，郭富城高調認戀上中國網模女友Moka，二人拍拖年幾至今依然打得火熱，一直未有結婚打算嘅城城，早前就揚言渴望成家立室。日前Moka喺微博貼相留言話：「望新的一年繼續努力加油，變成更好的自己，有沒有發現我有一點小變化呢？」搞到惹嚟大肚猜測，雖然城城事後否認Moka大肚，但就講到明「要開始計劃將來」，唔通嚟緊真係要嗌Moka做城嫂？
陳冠希(36歲)、秦舒培(26歲)
陳冠希舊年俾人踢爆同國產女模秦舒培拍拖，雖然中間傳出呢位「新希嫂」，未搞清同華誼兄弟時尚文化傳媒董事總經理趙磊嘅離婚手續，但依然無礙二人熱戀，早前仲有傳秦舒培已懷有8個月「小希子」，預產期係下個月，o依家喺美國待產。為咗日後一家三口住得舒適，陳冠希仲喺舊年8月斥資285萬美元(約2,250萬)喺洛杉磯築愛巢。緋聞情史一籮嘅陳冠希，估唔到都有成家立室嘅一刻。
陳浩民（ 48歲）、蔣麗莎（ 32歲）
陳浩民6年前同長沙姑娘蔣麗莎奉子成婚，期間陳浩民喺內地拍劇期間，俾人影到醉攬啜陳嘉桓，不過大住肚嘅蔣麗莎，最後陪老公出記招，身體力行撐老公。而佢生咗大女後，同陳浩民5年抱4，育有三女一子。陳浩民之前幫大肚老婆剃毛晒恩愛，一度引起外間非議。