雖然仲未夠提名票入閘，但民主派選委話要促成競爭嘛，相信喺撐薯片叔曾俊華之時，亦會分票畀退休法官胡國興，以便兩人一齊入閘，可能因此令胡官對力爭入閘仍信心十足，戰意亦高昂，繼續四出拉票兼爭民意，噚日仲回到母校英華書院做早會嘉賓，同全校師生一齊唱詩歌、念禱文，佢喺facebook話活動勾起佢好多讀書時嘅回憶，無限感觸！
查實佢今次返母校，主要係分享香港法治嘅重要，據聞吸引到部份舊生特登返校聽佢演講，可見號召力驚人。
之後佢喺鄭鈞傑校長同一班師弟一齊到英華歷史館睇展覽，欣賞二百年歷史嘅聖經館藏同過百年歷史嘅風琴。
胡官大爆自己仲有另一家母校，佢小四到中五都喺德仁書院讀書，雖則德仁已停辦㖭，但佢仲同舊同學保持聯絡。