唔少香港人返工忙到冇飯食，都會選擇食叮叮飯，好似一向做開微波爐食品嘅波仔，近年分店越開越多，波仔老闆仔仲諗住搞埋快餐店㖭。
波仔老闆、陽光一代董事長董品春話，阿仔有唔少諗頭，噚日仲介紹阿仔Raymond畀傳媒認識。細波仔Raymond話，返工向爸爸學咗唔少嘢，今年3月就會小試牛刀，自己打骰喺葵涌開首間波仔快餐店「滋味部屋」。波仔快餐店當然唔食叮叮飯，真係有廚師坐鎮提供堂食同外賣，仲有台式飲品㖭。
其實波仔今年都有唔少轉型大計，除快餐店外，噚日宣佈同橙汁生產商天溢森美（756）合作搞店中店，實行叮叮飯配橙汁。