獅子行噚日公佈一項高層人事調動，唔係集團行政總裁或者主席，而係滙豐香港工商金融主管陳樑才做咗超過40年，即將退休，獅子行委任趙民忠接替。
工商金融係銀行最傳統嘅生意部門，主要借錢畀中小企、廠商，如果話銀行係百業之母，呢個部門對推動香港經濟都幾重要，不過佢哋對客多，平日少見傳媒，大家對佢哋認識唔多。
趙民忠將於今年7月調任新職位，佢早於1986年加入滙豐，目前主要負責滙豐內地業務，現任滙豐（中國）副行長兼工商金融總監。根據資料，佢2009年擔任滙豐香港工商金融本地大型公司業務常務總監，慣同企業客戶做生意，新職難佢唔到喇。