I have a plane，I have a pineapple，噢！Pineapple……plane？冇錯，咪以為用筆先可以插菠蘿，其實一架平平無奇嘅紙飛機一樣做到，甚至連三尖八角嘅榴槤都插得穿。
話說費清睇過一條片，有個叫李廷煜嘅OPPA走咗上大陸電視節目，示範喺1分鐘內用紙飛機插穿12個西瓜，兼夾破埋世界紀錄。正所謂「膠處不勝寒，一山還有一山膠」，拎住「澳門紙飛機最遠飛行距離」紀錄保持者頭銜嘅香港專業紙飛機選手何溢昌，竟然決定隔空「挑機」，插西瓜之餘，仲要越級插菠蘿同榴槤。
何溢昌話，要插得入堅硬嘅果皮，唔洗用劍嘅，用普通紙摺嘅飛機就得。佢喺鏡頭前示範絕技，先將三個西瓜平排，好輕易咁逐一用飛機插入。之後到菠蘿，雖然硬好多，但一樣插得入。最後到硬到打得死人嘅榴槤，見佢全神貫注，但又唔係好用力咁，將架紙飛機掟出去，結果都成功插入，無花無假。（究竟試咗幾次先中，就唔知喇，鏡頭都冇show到......）
原來，紙飛機嘅摺法非常講究，佢參考咗李廷煜嘅摺法，仲話右撓一定要順時針咁摺，先可以順應出手動力。而除咗要夠尖夠硬，仲要有強勁嘅臂彎，落足臂力同腕力，最重要係配合準繩度，練習好多次先至成功。
玩膠玩到咁認真，難怪bossini早排都要搵佢拍返個廣告。