在任立法會議員時極度關心教育事務，「積極鞭策」教育局局長吳克儉嘅林大輝，卸任後有喜事，最近獲香港教育大學頒授榮譽院士，表揚對教育同社會作出嘅貢獻。現為林大輝中學校監嘅林大輝，1981年畢業於香港理工學院，2000年獲香港青年工業家獎，現為全國政協嘅佢歷任多項公職，4月1日仲會出任體院董事局主席。
獲教大頒榮譽院士
教育大學喺新聞稿讚揚現為理大校董會副主席、教大校長諮詢小組成員嘅大輝，一直支持教育發展，與另外三位同時獲頒榮譽院士社會人士，包括聖保羅男女中學校長兼附屬小學校監陳黃麗娟、創辦「陳校長免費補習天地」嘅陳葒，以及「馮燊均國學基金會」主席馮燊均，喺教育同社會服務方面均有非凡成就，喺社會擔當重要角色，啟迪後輩。 榮譽院士頒授禮3月31日喺教大大埔校園舉行，儀式由教大校董會主席彭耀佳主持。