方力申同鄧麗欣呢一對喺好多人心目中都係金童玉女，不過好可惜佢哋喺去年3月突然宣佈分手，至今差唔多一年時間，每逢佢哋出席活動都少不免被問及舊愛。
而睇嚟小方呢一年嚟都未放低，就好似去年分手冇耐嘅小方，喺6月上大台節目《娛樂3兄弟》時，被問及如果李安佢拍情慾文藝片，佢會揀邊個做對手，仲有傅穎、鍾欣潼、鄧麗欣畀小方揀，而小方諗都唔使諗就揀咗舊愛Stephy，佢仲講笑咁解釋可以叫高啲片酬咁話。
Stephy喺年底出席活動時講想同小方做番朋友，雖然Stephy之後透露小方未有主要聯絡，不過佢哋係冇耐之後就有機會同場出席慈善活動，雖然stephy活動完成就即刻離開，不過係台上都算有交流。
雖然及後少有小方同Stephy嘅緋聞，不過小方每次接受訪問亦唔介意講及舊愛，就好似早前小方被問及情人節點過，佢就主動講到：「我要避開呢一日，好痛苦，過去10年都有(情人)，未試過咁樣。」睇嚟一年時間都未放得低。