英國權威傳媒《BBC》前晚話朗尼今年內會離開曼聯，係睇吓嚟緊幾日走，定拖到夏天，而決定朗尼幾時走嘅人，竟然可能係中國國家主席習近平！
報道話朗尼獲領隊摩連奴批准離隊，朗尼經理人史查福特亦已經去到中國，同各間中超球會傾合約。史查福特同北京國安同埋天津權健傾過，權健領隊簡拿華路話朗尼唔啱使，據《BBC》嘅消息，國安都冇興趣。不過英國《太陽報》話國家主席習近平係國安擁躉，想愛隊可以請到個頂級球星，話唔定會喺背後發功喎。另外，英媒好似冇乜提到恒大個名，反而話江蘇蘇寧可能係朗尼落腳地。雖然中超轉會窗下星期二就閂，但《BBC》話朗尼都唔急住呢個月走，嚟緊夏天，就幾可肯定離隊。史高斯同堅尼兩名前曼聯隊友就呼籲朗尼唔好去中超，堅尼更加話朗尼喺歐洲仲有大把世界，仲未去到過檔中超嘅時候。
米希達利恩或無緣決賽
曼聯下周日會出戰英聯盃決賽鬥修咸頓，暫時未知朗尼有冇份踢，但卡域克同米希達利恩就應該冇份嘞。喺周三歐霸盃32強次回合，曼聯作客靠米希達利恩入波，以1:0贏咗聖伊天，兩回合贏4:0晉級；歐洲足協今日會舉行16強抽籤。不過，米希達利恩同卡域克喺呢場波傷出，摩帥都話佢兩個應該趕唔切英聯盃復出。