中國球壇轉會窗2月28日先關閉，睇怕未來幾日關於曼聯前鋒朗尼轉戰中超嘅消息一定滿天飛，但呢單嘢已經唔止小報吹水咁簡單，英國《BBC》周三亦報道指朗尼嘅經理人史查福特（Paul Stretford）正身處中國，睇吓有冇辦法為呢位尊貴客戶鋪後路，就算趕唔切未來一周達成協議，都可能喺今夏離隊！
不過，到底係邊間球會對朗尼有興趣一直冇人知，最初傳出嘅廣州恒大full晒外援位，《BBC》又表示有消息指北京國安唔係幕後玩家，而天津權健教練簡拿華路日前又講明「月巴」唔啱使，數數吓真命天子可能係江蘇蘇寧！睇番佢哋大軍目前有4位外援，包括巴西孖寶拉美利斯、阿歷士泰斯拿，哥倫比亞前鋒羅渣馬天尼斯同南韓守將洪正好，咁啱1月又將澳洲後衛沙尼貝利借去姊妹球會國際米蘭，唔通真係騰空個位畀朗尼？