「廿蚊一個波蘿包貴唔貴？」飲開咖啡睇開法國電影的「中產」曾俊華都話「過貴」。有甚麼辦法？成本高，自然羊毛出自羊身上。這個政府聲稱鼓勵年青人創業的「美食車先導計劃」於2015年出爐時，已令我發笑，原因再簡單不過，買車連改裝牌照乜費物費，未計食物成本和人工，開波起碼100萬，並不是普通年青人輕易拿得出來。
話就話效法外國的美食車文化，但應抄唔抄，在美國，一般美食車可自由停泊街上，重點是免租，但在香港，除規定八個地點營業，亦難逃交租厄運，各場地按月收取服務費，由近萬元至二萬多元起標不等，銷售高的美食車甚至會以分賬形式收取服務費，暫時人流較少的觀塘海濱收費最平，遊客較多的金紫荊廣場則最貴。政府作為業主咁識計數，求其劃個「山卡啦」地方給你做生意，就話鼓勵，佢冇成本啫，但你有喎！
車仔細細可以賣甚麼？離不開輕便小食，現售的食品包括五色餃、黯然銷魂漢堡、鮮忌廉菠蘿包、魔廚撈麵等，講真「貴冇人吼、平做唔住」，計你平均四十元一個交易，最基本兩個店員一個落柯打一個負責煮，月薪萬五一位唔過分。兩年牌照，不計賺錢和回本，若要做到每月收支平衡，每日一百單生意走唔甩，還要求神拜佛千萬不要打風落雨壞車入廠。開業數周，有美食車老闆表示平日的營業額比假日少一半，完全超出預算，還憂慮熱潮過後，人們不會主動前來，出現泡沫效應。
試想像一下，你先付我二百多萬(美食車成本連兩年場地費、人工、食物成本、雜費等)，兩年內我每月支萬五蚊人工俾你兩個，當你們做到氣咳日做百五單生意，我就還你一百萬美食車成本，聽落係咪好開心好興奮先？若然日做二百單，嘩，發達喇，多成幾千蚊一個月㗎⋯⋯每人，其實打份工會否輕鬆一點呢？做個sales萬零蚊底薪加佣金，已是一個成功美食車經營者的最好結果，而且不用出錢冒風險，如此簡單的數學不用我教了吧！
你可能會話：「生意嚟㗎嘛，可以長做長有，咪當賺經驗囉！」我認為做生意是因為有爆炸力，有機會獲取比打工多幾倍或幾十倍以上的收入，甚至令你發達，才叫生意，買份工來打可以做7仔吖！美食車風險大，無爆炸力，牌照兩年後如何不可預計，最慘是做到隻積咁。
近年在內地，連鎖式經營的多功能美食車大行其道，如佳佳旺、天天好日子、多樂福、鴻運來、千百味等均歡迎公眾加盟，只要你身上有一萬幾千，有些甚至聲稱免加盟費，免培訓費，美食車一年包換，三年包修，一個月回本，真又好假又好，起碼聽落夠噱先吖！齋車一百萬，不如趁未加稅買架Tesla揸Uber好過啦！
《Hea富學》作者
郭釗
www.facebook.com/heaology.edu