現年37歲的李焯寧（藝名李彩寧）99年入無綫藝員訓練班，拍完劇集《金裝四大才子》之後多了一個稱號「金牌丫鬟」，現時為自由身的她日前接受本報專訪時笑說：「我其實只係做咗四、五次丫鬟咋嘛！」
做安志杰女友
已轉行做marketing的李彩寧，透露稍後會返內地做management公司，她又指早年曾簽過中國星，拍過杜琪峯執導的電影《神探》做安志杰女友，跟劉青雲及林熙蕾有不少對手戲，她說：「拍到杜Sir嘅戲係一件好幸運嘅事，當然希望可以試唔同嘢，但之後因為檔期問題，TVB有劇要拍，取捨之下留番喺TVB。」
突然「叮」一聲
回想昔日在無綫日子，李彩寧表示：「TVB唔止係一個訓練你拍嘢嘅地方，仲有教你點樣爭取時間、紀律，你可以邊學邊做。機會係有好多，不過要睇吓你有冇運氣，咁我梗係希望兩邊keep住繼續做，我好welcome大家搵我拍戲，事實上我對拍戲好有熱誠，希望可以有新衝擊。」
當年李彩寧在無綫拿「老人牌」後離開，她說：「其實係突然間『叮』咗一聲，最大嘅因素係覺得睇唔到前面，唔知前面嘅路可以點樣去行，雖然機會係多，但係始終冇運氣，所以諗諗吓咪決定出去闖吓，呢個係令我成長嘅一個地方，當你離開出嚟做嘢嗰陣，你會發覺有好多嘢可以應用到，做人會成熟，𠵱家有個底，感覺穩陣同有信心。」
採訪：何慧斯
攝影：沈健程
化妝：Hazi Leung
髮型：Y-man chau of I hair alpha
場地提供：Big Echo i-Box