陳茂波出任財爺後發表嘅首份、亦都係佢最後一份財政預算案後，噚日出席立法會財委會，向議員滙報預算案內容，本身係「梁粉」嘅佢就被議員質疑係「曾俊華2.0」。點解？公民黨郭家麒發言時話呀，之前梁振英、林鄭月娥都時有批評曾俊華，有人話曾「hea住做」、「不思進取」，點知波叔份預算案嘅派糖方法、預留撥款等做法，同曾俊華做法一模一樣喎。
雖然似薯片叔，對部份民主派中人嚟講可能係讚美，但波叔就似乎唔想有薯片叔陰影嘞，笑笑口撇清關係：「我唔係John 2.0，你睇我都冇鬚。」
民望急升13分
其實波叔升呢財爺任發展局局長時，民望一直喺谷底徘徊，點知佢呢份處男兼告別作令佢大翻身？港大民意研究計劃噚日公佈預算案民調，波叔嘅評分由月初得34分急升13.4分至47.4分，雖然仍然低於50分嘅合格水平，但好明顯係民望大反彈喇！