麥長青（麥包）2014年同太太林孜曾投資炒iPhone 6，點知被人話佢同騙徒合謀詐騙。噚日麥包喺九龍灣出席「耳聰．十二年攝影展開幕禮」，佢主動提起iPhone騙案，話騙徒已被判監，麥包澄清係投資咗400多萬：「終於鬆口氣，證明我太太係無辜，因為一直有位女士覺得我哋有份，我哋已經解釋咗唔關我哋事，佢仲不停滋擾，搞到我屋企人一定追究，我老婆連瞓覺都驚醒，我要拖住佢瞓，壓力好大，佢只係普通師奶仔。」
「搞我超過兩年」
除咗金錢損失，麥包亦不停受到滋擾：「400幾萬冇㗎嘞，唔見錢唔係問題，大家都係受害者，之前騷擾我一直忍住，直到今日判咗，其實我一路都好嬲，佢打電話恐嚇我太太，解釋佢又唔聽，仲搵收數公司搞我，搵紋身嗰啲人去TVB、我代言嘅地方嘈，超過兩年。」所以，佢決定追究：「唔多唔少都有影響，聽講我冇嘢做、唔獲續約都可能係因為呢件事，真係要追究。」
麥包喺活動上話耳仔喺拍《飛虎》時被打傷，過後拍戲見暈，醫生檢查後話係受撞擊所致。
撰文：馮仁昭