現年37歲嘅李焯寧，原名李明麗，曾用李彩寧做藝名，佢中五畢業後做過秘書，其後於1999年加入無綫，翌年畢業於第14期無綫電視藝員訓練班。
李焯寧喺無綫效力13年，參演過逾80套劇集，雖然唔係擔正，但係佢出鏡率都高，好似佢喺《金裝四大才子》做嘅安安，就係朱娉婷（陳松伶飾，四大才子之一文徵明之妻）個妹仔、《天幕下的戀人》演「傲翔坊」諮詢處職員，近年啲嘅有《公主嫁到》演司膳房嘅羅司膳等；而李焯寧亦演過唔少長篇處境劇，例如《天天天晴》同《畢打自己人》等。
不過，李焯寧喺2012年約滿無綫，轉投香港電視，拍過《警界線》同《三面形醫》等劇。
現時為自由身嘅李焯寧，忙緊拍網絡劇《使徒行者2》，同時佢亦緊貼潮流，喺Instagram同facebook等社交平台，同網民及fans有更直接嘅溝通。