香港大學深圳醫院成立咗5年，經過唔少風風雨雨，欠港大嘅錢有排先還清。噚日港大深圳醫院舉行5周年慶典活動啟動儀式，上年接任院長、人稱鐵醫嘅換肝權威盧寵茂致辭時語重心長，話5年前港大由薄扶林走到紅樹林（因為深院附近有個紅樹林），實現深港合作，希望醫院5年可以趕上香港瑪麗醫院服務80年；10年就可以傳承醫學院130年既教研成就，相信呢個5歲「細路」，會喺體現一國兩制嘅道路上留低深深印記。
呢次慶典啟用禮好大陣仗，年中會卸任嘅特首梁振英、年底會走人嘅港大校長馬斐森，食物及衞生局局長高永文以至政制及內地事務局局長譚志源都有出席。
梁特話40幾年前第一次去深圳，相對今日（噚日）再去，好似走咗入時光隧道，大讚深圳改革開放發展快速，仲讚深院發展已經達國際水平。