特首梁振英雖然做埋呢幾個月特首就冇得撈，但佢絕冇因為咁而hea做，亦無影響佢喺餘下任期積極搞內交，噚日佢就去咗深圳見市委書記兼市長許勤，就算即晚返港，都特登去廣州一轉，拜會廣東省委書記胡春華。有政界口痕友話，梁特現時放眼祖國，等緊做國家領導，未來幾個月仲會積極搞內交，打好關係。
見完許勤拜訪胡春華
梁特今次行程好緊密，見完許勤後，仲要去廣州會合主持粵港合作聯席會議工作會議嘅政務司司長張建宗，傍晚拜訪廣東省委書記胡春華，其實粵港合作聯席會議一向由政務司司長搞，梁為乜特登走一轉？嗱，盛傳胡春華係下屆政治局常委熱門人選，梁特盛傳快做政協副主席，梗係要同胡打好關係，但內地官場都知，梁特俾習DQ消息，查實胡春華又想唔想同一個俾習DQ嘅人行得咁埋㗎？