東方「退票風波」後，唔少球迷關心比賽嗰陣，天河體育場作客球迷區究竟有咩球迷。筆者「實地考察」，發現呢區除咗「佛山某公司」員工外，仲有持各區門票但冇大陸身份證嘅人士，包括港足主帥金判坤。
香港球迷一直搵唔到作客球迷區嘅購票方法，於是我噚日膽粗粗北上，嘗試買飛睇愛隊東方。由於天河體育場場外嘅票務中心冇飛賣，最終冒險幫襯黃牛黨。抵達天河時約中午兩點，距離開波仲有六個鐘，但已聚集多位黃牛黨。最終我買入一張VIP飛，夜晚戰戰兢兢咁「入閘」，結果喺實名制下，以回鄉卡成功進場。不過，「富中國特色」嘅情況理所當然咁出現，我手持貴賓飛，但因為用回鄉卡，係香港人身份，所以被「逼遷」到門票價格較低嘅作客球迷區。有波睇都唔介意得咁多，但身邊有唔少着住恒大波衫嘅「回鄉卡持有人」（實在好難叫佢哋做香港人），確係搞笑。正所謂做戲做全套，佢哋最終都乖乖地除咗件波衫，進入客隊球迷區。
入場後發現，連港足教練金判坤、助教廖俊輝、安尼頓、仲有我最愛嘅和仔李健和都係被逼遷嘅一群。可以同佢哋一齊睇波，呢幾嚿水人仔勉強都算值啦！東方死忠