呢頭星期二短線資金畀人當落水狗咁打，隔一日資金又嚟衝過，沽家市場又即刻變番買家市場，但沽完又嚟衝過就等於賭博，贏面唔大。眼見長線投資購買力罕有勝過短線客，又有唔少人講緊港股重拾長線升浪、坐定定就冇錯之時，成件事更需要拉長嚟睇，去量度究竟升市去到邊個stage，同埋研究真升市機會有幾大。
話明拉長嚟睇，所以連周線圖都嫌短，要睇月線圖，成個picture似乎清晰晒。
首先，用保歷加通道去睇升市去到乜嘢stage。原來恒指早於去年8月，已經收復中軸，目前已經幾接近上軸24747點，而過多4個交易日，去到3月份上軸會大概收窄到24200點左右，即係話，下個月幾可肯定hit到條上軸，反映港股已升到一個長線頗高嘅位置。如果hit唔到，仲使問？自然係跌市。
恒指hit到保歷加上軸，通常會有阻力而整固，但更重要嘅係，要睇埋恒指hit到保歷加上軸之時，通道係擴闊定係收窄當中，就知升市係龍係蟲。觀察過往30年恒指走勢，如果恒指hit到上軸時，通道係擴闊（圖表長方形個案，唔好意思請畀少少眼力），恭喜你！呢個係真升市，最多整固幾個月，就會發力，仲要係升得勁，2003年10月突破上軸然後步入四年牛市，或2014年7月突破上軸然後翌年進入港股大時代，就係典型例子。
如果hit到上軸時，通道並非擴闊中（圖表中圓圈個案），唔好意思，多數係見頂訊號，過往30年出現4次，其中一次，少則2013年中嘅錢荒跌市級數，多則當出現訊號後幾個月便進入2011年歐債危機，甚至係即時爆發8964股災！唯一能擺脫跌市命運，只得1999年5月嘅科網股熱潮之前，但都要呆返幾個月先再開車，而呢個特殊例子，喺指數整固期間，保歷加通道要由收窄變為擴闊，由劣勢變強勢嘅訊號先能夠確立，大家到時要辨別，唔困難。
圖表話你聽，未來幾個月最叻就係橫行市，押注主流股份，只有幾百點量度升幅，但量度跌幅可能去到二萬點甚至更低，咁仲值唔值得博主流股份？就算要博1999年翻版，亦大可以喺未來幾個月輕倉觀望。信30年圖表，定係信得把口去演繹升跌嘅基本因素？自己決定。
晉佳
http://fb.com/advanceguy1