講起皇馬，畀人印象都係粒粒皆星，自己啲青訓就扔埋一邊。今季皇馬排緊西甲榜首，歐聯又入咗16強，其實兩個喺足智彩譯名好長嘅皇馬青訓產品都有重大貢獻，小弟就會講吓盧卡斯華斯基斯（圖）。
華斯基斯今年25歲，踢開翼鋒，喺皇馬C隊踢到B隊，再借去友會愛斯賓奴，上季起開始喺皇馬等上位。原本以為華斯基斯坐兩年板凳，就會好似啲前輩咁走人，但教練施丹鍾意輪換，賓施馬同加里夫巴利又輪住嚟受傷，所以華斯基斯都成日有得踢，尤其今季，巴利前排養傷三個月。喺家陣皇馬前場，華斯基斯好重要，因為佢係少有、亦可以話唯一嘅綠葉。
由「BBC」到艾華路莫拉達，皇馬呢四位鋒將都係紅花，但啲紅花多有個問題，就係個個都係大佬，而華斯基斯就係唯一一塊甘願做配角嘅好綠葉。唔計禮拜三對華倫西亞場波，華斯基斯今季喺西甲同歐聯加埋有九次正選，呢九場場均跑動超過11公里，對多蒙特仲跑咗12.69公里咁多。
除咗肯跑，華斯基斯仲要唔貪功，西甲場均一次射門都冇，原因唔係佢射術差，而係鍾意為啲前場大佬製造機會。華斯基斯今季西甲已經有四次助玫，唔貪功之餘又肯跑，華斯基斯應該深得一眾大佬歡心，係呢支皇馬嘅無名功臣。
文：咖喱