近排枕住有未勝馬開齋，這晚（22日）谷草一開場，又有徐雨石馬房「敬無極」在雷神莫雷拉胯下大熱開齋，勝出第一場五班1650米，呢匹六歲英國自購馬第18次在港出賽，終於在「五班處女馬救星」雷神胯下首度建功，單Win及組合獨贏A1分別派25及16元。
「敬無極」上仗同程由黎海榮跑第四，今次報名時有優先出賽權，加埋首度由雷神策騎出賽，所跑的是賽前在港唯一曾上名的快活谷，擺明車馬就係想開齋。結果此駒被捧成大熱開跑，沿途前置守第三位，雷神留放恰到好處，直路從內欄取位上前，一加速即超越所有對手以半馬位之先勝出，人馬發揮都好理想。
雷神延續早糊王本色，亦因此再創新高，累積於今季自己有份跑的46次賽事都有馬贏，以及個人在去年9月25日刑滿復出後一連43次賽事贏馬冇斷纜，距離個人季內100Win大關只差兩場。今場同時見證佢同徐雨石於2017年首次合作贏馬，徐雨石已連續第二次賽事建功。
徐雨石表示「敬無極」今仗排好位，對爭勝起了很大作用，牠跑1200米往往追唔切，現時1650米最合。徐雨石又透露是他主動聯絡莫雷拉，希望借助對方騎功爭勝，結果人馬發揮令人十分滿意。石哥謂該駒以往在四班都近，如今五班當然有利，加上陣上形勢非常好，贏馬合理。
頭場賽果熱頭冷腳，二至四名分別為「大爆發」、「天工駿駒」及「銘記心中」，四重彩派三萬五千幾。