朗尼離開曼聯轉投中超呢單報道已經傳咗一段時間，佢喺曼聯就算唔傷都係坐冷板凳居多，去中超都係唔錯嘅選擇。對於有關朗尼離隊傳聞，領隊摩連奴就不置可否咁回應：「你要問番佢。我都唔保證自己到下個星期仲喺度，又點知一個球員下季會唔會走？唯一可以保證嘅係，我從來唔會去強迫一位球會傳奇離隊他投，我唔想佢走人。」
下周二係中超轉會窗關閉嘅日子，朗尼喺嗰日前投奔大中華就一啲都唔奇。雖然到𠵱家都未確實有一間球會公開承認有意斟介朗尼，其中天津權健主帥簡拿華路更講明風格唔啱唔會簽佢，但英國傳媒已經吹到行晒，有中超球會會向曼聯支付3,500萬鎊轉會費，兼且開出世界最高周薪100萬鎊去利誘朗尼過檔，如果喺事實相信曼聯冇拒絕餘地。曼聯喺下周日進行英聯盃決賽，已經復操嘅朗尼可以候命，如意算盤係喺當日捧埋盃後光榮告別，轉投中超。