周二歐聯16強首回合賽事入球大爆發，兩場比賽合共產生14個入球。馬德里體育會三大射手各入一球下，作客利華古遜贏4:2；另邊廂曼城喺主場迎戰摩納哥入波仲多，兩度落後下以5:3反勝對手，兩隊陣中王牌前鋒阿古路同法卡奧一樣有波入，新舊馬體會射手喺呢晚歐聯玩晒。
曼城迎戰摩納哥場波峯迴路轉，主隊由史達寧喺26分鐘開紀錄，但完半場前俾摩納哥嘅法卡奧同基利安洛天各建一功下落後1:2。易邊後曼城幾乎被拉開比數，可惜法卡奧主射12碼被曼城門將韋利卡巴尼路救到。之後入球梅花間竹，阿古路扳平2:2；法卡奧回敬一球幫摩納哥再次領先；到71分鐘阿古路又入波扳成3:3。曼城守將史東斯同中場利萊辛尼分別喺77同82分鐘各入一球，終於喺呢場咁緊湊嘅比賽助主隊贏5:3。
曼城5:3除「摩」創歷史
一場歐聯比賽入八球唔算太出奇，但其實呢場波係歷來第一場歐聯淘汰賽階段首回合比賽入到八球。阿古路同法卡奧喺今仗各入兩球，呢兩位南美球員先後都效力過西甲馬體會。阿古路現時地位受到巴西新星加比爾捷西斯威脅，後者突然受傷提早收咧，阿古路仲唔把握機會向哥迪奧拿證明自己實力咩。法卡奧喺英格蘭沉咗兩年，今季返去摩納哥啲入球觸覺返晒嚟，今場波又再證明自己仲係頂級射手。
哥帥不滿後防
曼城主帥哥迪奧拿賽後話：「摩納哥進攻火力好勁，我哋有需要進一步提高後防表現，我敢講如果次回合作客摩納哥，我哋冇波入的話就肯定會被淘汰。另外門將卡巴尼路今場屢救險球，亦應記一功。」摩納哥領隊查迪姆指法卡奧12碼宴客，係比賽轉捩點：「呢場波對球迷嚟講肯定會好滿足。法卡奧射失12碼係己隊贏唔到嘅關鍵，但佢喺今日又證明到佢係世界級前鋒，同阿古路一樣。仲有次回合比賽，我哋依然有機會晉級。」