由香港多間中資銀行舊年成立嘅香港中資銀行業協會，噚日處女作喺建行大廈舉行香港中環金融論壇，一班中資銀行行長、老總都有出席，好似拜年咁熱鬧。
講者之一嘅港交所（388）首席中國經濟學家巴曙松見到一班同鄉，講到中資行未來發展都好興奮。以前一向喺銀行工作嘅巴曙松，雖然家陣去咗港交所，但就話好歡迎台下各位去港交所坐吓、交流交流，事關港交所能操普通話嘅員工雖然唔多，但正係「穩步上升」，溝通完全冇問題咁話。
講開又講，中資機構一向好團結，而且着重中華文化。好似中資銀行業協會成立時嘅會章都只得中文版，唔知譯番個英文版本未呢？