大台呢排又有甚麼扮時事真人騷式節目講樓市，以呢位女監製過去手法，自不然又爆出一啲金句，好似有樓有高潮，不過最爆仲有女受訪者拍埋啲蛇貓狗式艷照，搞到面書洗晒版。講番佢之前個節目就探討香港怪獸家長，又係有「贏在射精前」呢個金句，今時今日香港教育制度千瘡百孔，小學生一日閒閒地十樣八樣功課，每星期唔係默書就係測驗，佢唔去幫學生減壓，仲助長呢個標籤制度風氣，真係衰過「唔得掂」。
要踢大會有時真係講吓出身，好似皇馬以往真係唔算重用青訓，好似卡斯拿斯、魯爾呢啲成名例子真係唔多。好彩呢幾年皇馬對青訓兵嘅態度有明顯改善，唔少自家製品都成才，好似戰友咖喱喜歡嘅盧卡斯華斯基斯（右），而更值得欣賞，仲有通天後衞拿祖費南迪斯。
做皇馬後衞一向吃力不討好，做青訓後衞更加難出頭，幸好拿祖勝在各方面平平穩穩，而最大優點係可出任中堅、左右閘位置。其實27歲嘅拿祖，12歲已經被驗出先天性糖尿病，面對多食、多飲、尿頻及體重下降等問題，唔好話成為職業球員，健康成長都好難，拿祖就肯苦幹，一直嚴格控制自己，先至可以成為皇馬常規大軍，仲入選埋西班牙國家隊，所以甚麼贏在射精前、贏在起跑線呢啲歪理，真係少聽為妙。
文：牽牛