澳門猛人周焯華（洗米華）旗下的太陽城集團邁向10周年，昨晚假澳門新濠影匯綜藝館舉行「傳奇之夜」演唱會，豪擲千萬邀請天王天后張學友、陳奕迅、周杰倫、鄭秀文、孫燕姿等表演，吸引眾星名人過江朝聖。
魔術出場
演唱會由魔術師劉謙打頭陣，變出坐哈利電單車的洗米華型爆登場，風騷跟觀眾打招呼，跟着用半桶水普通話介紹古天樂出場：「其實呢個人在音樂很厲害，比劉德華更好，後來他去拍電影，但拍電影一般，我隆重介紹：香港周焯華先生，我叫澳門古天樂。」古天樂現身，洗米華說：「不如你唱番首《今期流行》。」但古仔不肯，反玩洗米華：「一陣洗米華會同阿嫂唱歌畀大家聽。」之後鄭秀文和老公許志安同台合唱《唯獨你是不可取替》，氣氛high爆。
此外，開騷前眾嘉賓行紅地毯，着黑西裝襯白鞋的洗米華罕有受訪，但只談生意不提老婆洗米嫂和情人Mandy Lieu。他表示昨晚招待4千觀眾，問到是否有周董和陳奕迅表演？他指着身旁的太陽娛樂董事總經理黃柏高（Paco），說：「畀Paco答。」Paco說：「佢哋都係嚟幫手，係好友關係。」再問會否簽多些藝人開多些戲？他再交波給Paco，Paco表示將籌備幾部國際化動作片。
四太稱讚
何鴻燊四太梁安琪帶兒子猷亨現身，她說：「太陽城十周年發展好好，洗米哥哥有咁成績，好值得澳門人開心。」四太說完即轉身走，猷亨更早一步入場避談傳入澳博事件。楊千嬅壓軸行紅地毯，她說：「因為老公（丁子高）有份做PR，兩日都冇見，今日陪老公嚟。」對於太陽娛樂計劃開拍動作片，千嬅說：「自己都好想拍，做拱橋都得，都要拉番吓筋，希望拉長3吋。」千嬅更自爆早前見到寇鴻萍，被對方問是否懷孕：「可能見我肚腩凸出嚟！」
採訪：張俊銘、畢紹基
攝影：沈健程