香港前冠軍騎師潘頓今晚（22日）落場比賽前，已連續兩個賽日食白果，成績停滯不前。
卒之潘頓用行動證明，騎師有好馬的話，自然識贏。全晚其澳洲鄉里練馬師蔡約翰，有兩駒交予潘頓操刀，分別是第三場「得意繽紛」及第五場「翩翩」，結果贏完一隻又一隻。其中第五場二班1000米之「翩翩」以1.5倍全熱門身份保持谷草不敗，累積兩戰兩勝谷草1000米，亦成為今季新一匹四捷馬，今場單Win及組合獨贏A1均派15.5元。
四歲馬「翩翩」連同今仗出賽七次，得四冠三亞全入Q，上仗田草1200米僅敗，呢次回師快活谷對手較弱，負130磅亦一早守內叠第二位，直路加速彈離1.75馬位輕勝；由於「翩翩」在五歲前首勝二班賽兼評分夠80分，除頭馬獎金997,500元外，馬主黃言信額外有75萬元優異成績特別獎金。而出名美艷的黃言信太太，賽後一身招牌黑衣亮相，露出一雙雪白玉臂，搶晒風頭。
潘頓及蔡約翰憑「得意繽紛」及「翩翩」，兩人季內首度攜手起孖，其中蔡約翰最新增至在港累積1,001場頭馬，再創從練生涯新高。
第五場前四名有熱有冷，其中二至四名由「喜益善」、「美麗皇牌」及「傑飛」順序拎到，四重彩派5,558元。