馬體育會嘅前射手阿古路同法卡奧都喺周二歐聯發威，現役射手埋基沙文、加美路同埋費蘭度托利斯都冇失威，各入一球幫球隊作客輕取利華古遜4:2，家陣有一隻腳入咗八強囉。
沙奧尼古斯（左）同基沙文各建一功，令馬體會半領先利華2:0。比拿拉比雖然喺48分鐘幫利華追番一球，但加美路喺59分鐘射入12碼，令馬體會再次領先兩球。利華喺68分鐘靠馬體會後衞史提芬沙域擺烏龍而追成2:3，不過費托喺86分鐘頂入埋齋一球，最終馬體會贏4:2。雖然馬體會贏波，但佢哋教練施蒙尼喺71分鐘換走加美路時，鏡頭影到基沙文表現得非常不滿。
基沙文當時咁講：「唔好換佢呀！佢真係踢得好好㗎。」加美路行出場亦面黑黑，事後佢話唔明施蒙尼點解換佢，不過就尊重佢嘅決定。
話時話，基沙文呢場波建功後喺歐聯累積入咗13球，超越入12球嘅西班牙名宿阿拉干尼斯，成為馬體會喺歐洲賽入波最多嘅球員。