達明一派的歌曲夠貼地，因為有至強的填詞人做後盾，早期《石頭記》及《馬路天使》等出自陳少琪手筆，82年他跟劉以達學樂器，只交了一個月學費，達哥搵他填詞補數。之後又寫《禁色》，被視為同性戀之歌，陳少琪說：「同明哥傾咗，想寫俗世排斥或不容許嘅關係，俾人壓迫下要收埋自己，未必係同性戀。」早期達明出騷，陳少琪上台幫手按鍵盤，曾被視為第三名成員，他笑說：「當時我係做programmer，試過控制5、6部琴，結果出到嚟亂咗，黃耀明企喺前面望住我，哈哈！」
自薦填詞
現於浸會大學文學院人文及創作系擔任助理教授的周耀輝，當年膽粗粗向明哥自薦填詞《愛在瘟疫蔓延時》，之後創作對情慾描寫到肉的《忘記他是她》，他笑說：「冇乜人寫，咁我咪寫。」六四後周耀輝寫了《天問》，一度被內地列為禁歌，他說：「碰上咁多不公不義，想提出對沉默啞忍逆來順受嘅質詢。」當年周耀輝在政府機構任職，因六四事件決定「劈炮」。
配合性格
達明第一首主打歌《繼續追尋》出自潘源良之手，他為達明寫了多首關於社會議題歌曲，包括《今天應該很高興》、《你還愛我嗎？》。潘Sir說：「每個歌手同組合都有唔同性格，唔係話我故意。」
原來當初唱片公司曾要求《十個救火的少年》寫愛情，潘Sir說：「我寫一個版本講愛情，畀佢所謂B餐，我梗係鍾意A餐，就用曲線方法convince佢哋。」潘Sir希望達明如歌曲《繼續追尋》：「希望佢哋會做到想做嘅嘢，然後不斷尋求突破。」
採訪：余燕儀、馮國康
攝影：陳慧安
場地提供：穴藏@又一城（陳少琪）、又一城歡天雪地；大益欄@油麻地果欄（潘源良）