正所謂水鬼升城隍，陳茂波由發展局局長升呢做財政司司長後，今日下午仲會極速升呢至署任特首，雖則得嗰半日咁多，但都肯定令佢笑呵呵。而佢噚日就公佈任內首份財政預算案，唔知表現會唔會影響下屆有冇得留低？但無論點都好，八方肯定佢同太太許步明都好緊張，一早就現身會議廳，波叔讀到預算案尾段，波嫂仲一度用紙巾拭眼，唔通覺得老公好厲害，感動同激動到喊？
一早到場霸靚位
預算案11點開始宣讀前，波叔波嫂已經到達立法會，波叔仲係最早到會議廳嘅官員，當時成個會場一個議員都未有；至於波嫂亦係喺專為官員、行會成員而設嘅公眾席，最早坐定定嘅一位，霸定中間靚位等住睇老公表演，會前仲好興奮咁向議事廳內嘅老公揮手say hi。
波叔足足讀成兩粒鐘，內容甚無驚喜，仲提到自己出身貧寒，大玩煽情，難怪唔少議員難敵睡魔，全場最專心或者係波嫂，一直全神貫注；波叔讀到尾段，波嫂似有感觸「眼紅紅」，一度用紙巾拭眼；會後被記者追問因咩事落淚、會否支持丈夫留任等，均笑而不語。
宣讀預算案期間仲發生咗段小插曲，當波叔讀到第68段、提到要動用10億元推動青年發展之際，可能意外觸動咗枱面部iPhone內置嘅Siri功能，Siri真人發聲一句：「I don't see anything connected」清晰入咪，直播全港，波叔一時不知所措話：「對唔住，（我）唔知發生咩事」，相信佢都估唔到，自己份預算案會有位特別觀眾。
李八方
