大台實況節目《有樓萬事足》前晚播出第二集,訪問咗一對「無殼蝸牛」年輕夫婦,28歲做全職舞蹈員嘅Henry同做「Slash」(身兼多職)嘅Hathi係裸婚一族。舊年mood到結婚,但婚後冇擺酒,兩夫妻仲要分開住。現在Hathi同父母及細佬住喺一間二百幾呎嘅公屋,老公Henry就住天水圍;每星期老公會去老婆屋企短敍,但佢哋張床只得兩呎半,要用腳踏加闊張床,但最尷尬係同父母近在咫尺,連板間都冇,真係如游蕙禎所言連「扑嘢」地方都冇,Hathi坦言:「所以好多嘢都要好細聲。」雖然居住環境好擠迫,但兩夫婦依然恩愛,老婆Hathi覺得愛一個人唔應該建基於擁有啲乜,Henry亦冧爆承諾:「我將來畀到乜都會盡力畀佢,我咩都冇,但有乜會一齊傾,一齊面對。」