七警被判監兩年，「藍絲」組織紛紛幫佢哋籌安家費，包括自由黨。自由黨噚日同傳媒團拜時宣佈會成立「關懷七警家庭基金」，初步目標係籌100萬，以平均分畀7個家庭，解決燃眉之急，之但係到底係按月分發、抑或一筆過咁畀呢，就仲未有決定，所有行政細節都要稍後再傾，但強調有關款項係唔會用喺七警案嘅訟費上。
該黨副主席、立法會議員邵家輝認為判刑太重，仲自爆知道判刑後，有為七警落淚㖭。佢透露，考慮緊捐出半個月至一個月嘅議員薪金畀七警喎。黨友周梁淑怡亦好關注呢件事，佢個人留意到，有啲針對法官嘅人身攻擊，擔心呢件事都會對法治有影響。