今時今日嘅香港，唔少人連知法犯法、罪加一等嘅道理都唔明，真係可悲。睇吓前特首曾蔭權被判監，幫手寫求情信嘅人竟然有唔少昔日嘅政敵，反而唔少當時把口話撐嘅人連影都冇。
八方講咁多，無非想話犯咗法就自然要坐監，坐完咪重新做人囉！好似昔日頭號梁粉、前全國政協委員劉夢熊，去年被判妨礙司法公正罪成收監，轉吓眼，本月27號刑滿出獄。
尖啤喺特首選舉提名期完結前重出江湖，八方好期待佢會唔會有驚人舉動？難得重獲自由，梗係要好好休息、同啲老朋友敍吓舊食吓飯先啦。
八方聽聞尖啤已經約咗包括民主黨劉慧卿、單仲偕等各界友好，喺28號晚、即係出冊翌日喺尖沙嘴食飯洗塵，唔知席間會唔會傾到，呢場特首選戰同上一屆，有冇乜嘢異同之處呢？