華置（127）大股東劉鑾雄個仔劉鳴煒，肯定屬於人生勝利組，但佢噚日出席協青社活動時自爆父母本來對佢冇乜期望，自己亦非常迷失，係「非常唔精英，考B同C嘅人」，直到14歲嗰年，媽媽寶詠琴第二次癌病復發，佢先至驚覺媽媽未必能夠睇到佢大學畢業，於是急起直追。
佢憶述，寶詠琴當年去美國醫病，原本狀況正常，但兩個月後再見，已經「面青青，黃黚黚，冇晒頭髮」，佢俾呢個畫面刮醒，發現「媽咪可能冇咁長命睇到我中學畢業、大學畢業」。之後12至18個月，佢發奮冇玩，齋讀書補習，最終考得全科10A。
佢又提到，攻讀博士學位時，又再迷失方向，後尾自己改去考機師牌照，「唔係放棄讀博士，而係有個break」，畀自己重拾方向。
對於唔少人批評佢離地，劉鳴煒回應話，做青年事務唔係「你出身基層、住公屋，而係你有冇喺對方角度睇」。佢認為，青年事務係由傑青到邊青都關事，身份、出身唔會影響佢對青年事務嘅支持。佢最近就抽空喺周末學習兩小時木箱鼓，準備4月為協青街舞劇客串表演，噚日佢亦有露兩手。
講到特首選戰同華置事務，佢就唔願多講了。
