宣稱全部真人真事嘅大台實況節目《有樓萬事足》前晚首播，上一個單元講完「高潮女」Seasun之後，下半Part就講番啲好勵志嘅買樓故事。
唔係個個女人買樓都諗住靠男人，21歲、讀緊大學Year 4嘅Vivienna，話佢嘅做人格言唔係「知識改變命運」，而係「買樓改變命運」。Vivienna去到一間背山面海嘅豪宅入面，都不禁講咗句：「做人做到咁(住dream house)，真係做咩都制啦！」Vivienna就唔似「高潮女」Seasun咁一心諗住搵個有錢男友，自己都有好積極搵錢同儲錢，本身係靚女嘅佢，賺錢能力極高，未畢業已經做十幾份兼職，包括保險、Model等平均一個月搵4萬，甚至十幾萬都有，真犀利！佢話﹕「我嘅目標係要26歲前買樓！」
節目中，仲有影埋Vivienna班同學仔，唔少男同學好似仲未好有plan，更加冇諗過買樓，難怪Vivienna講明鍾意一啲比較成熟型嘅男士，佢話：「我鍾意年紀大少少，都有4字頭追我㗎，諗嘢成熟啲，大部份都事業有成，有樓有自信。」
另一位公開「招親」、32歲仍然係單身嘅謝雅櫻（Inky），屬於黃金盛女，係一間中小企做市場策劃經理，年前靠自己死慳死抵咗間303萬嘅窩居。佢透露自小由媽咪獨力湊大佢同細佬，所以好細個已經好獨立，立志要買樓，人哋去玩佢就去做暑期工賺學費，佢話靠自己嘅感覺好開心。講到慳，Inky除咗買嘢一定講價、一煲湯可以頂5日肚之外，仲會自己剪頭髮。有樓有錢事業，不過謝雅櫻回頭一望，覺得自己仲係缺少咗啲嘢，佢話㗎「覺得自己需要一個伴侶，人生唔係咁完整，好多人鍾意另一半有樓有車，我就只想要一個專一嘅男人，呢樣重要過一切。」